جو قومیں خود کو بدلنے کا ارادہ نہیں رکھتیں خدا بھی انہیں بدلنے کا وعدہ نہیں کرتا۔ کنوینر ڈاکٹر خالد مقبول صدیقی
پچاس سال قبل تعلیم کا راستہ بند کرنے کے لیے کوٹہ سسٹم لگایا گیا تھا اب سیاست تعلیم کی راہ میں رکاوٹ نہیں بنے گی، ڈاکٹرخالد مقبول صدیقی
جو قومیں خود کو بدلنے کا ارادہ نہیں رکھتیں خدا بھی انہیں بدلنے کا وعدہ نہیں کرتا۔ کنوینر ڈاکٹر خالد مقبول صدیقی
کراچی : متحدہ قومی موومنٹ پاکستان کے کنوینر ڈاکٹر خالد مقبول صدیقی نے کہا کہ پاکستان کے اس بد نصیب صوبے سندھ میں پچاس سال قبل تعلیم کا راستہ بند کرنے کے لیے کوٹہ سسٹم لگایا گیا تھا لیکن اب سیاست تعلیم کی راہ میں رکاوٹ نہیں بنے گی اور آئندہ آنے والے پانچ سال اس شہر کے لیے بہتر ثابت ہونگے۔ ان خیالات کا اظہار انہوں نے وفاقی وزارت آئی ٹی کے ادارے اگنائٹ کے تحت راشد منہاس بوائز اینڈ گرلز سیکنڈری و پرائمری اسکول ناظم آباد نمبر 1 میں ڈیجیٹل آئی ٹی لیب کی افتتاحی تقریب کے موقع پر خطاب کرتے ہوئے کیا۔
ڈاکٹر خالد مقبول صدیقی نے مزید کہا کہ اس تیز رفتار دنیا نے سب کچھ بدل کر رکھ دیا سوائے اس کے جس نے خود بدلنے کا ارداہ نہیں کیا اورجو قومیں خود کو بدلنے کا ارداہ نہیں رکھتیں خدا بھی انہیں بدلنے کا وعدہ نہیں کرتا اور آج دنیا کی سو بڑی کمپنیز نے ڈگری کی شرط ختم کرکے قابلیت کو معیار بنایا ہے اور یہ اس بات کی دلیل ہے کہ آج ڈگری سے زیادہ قابلیت کو ترجیح دی جارہی ہے جو کہ خوش آئند ہے۔
اس موقع پر وفاقی وزیر برائے انفارمیشن ٹیکنالوجی سید امین الحق نے شرکاء سے گفتگو کرتے ہوئے کہا کہ نوجوانوں کی مہارتوں کو فروغ دینے کے لیے ملک بھر میں مفت آئی ٹی کورسز شروع کیے گئے ہیں جس ڈیجیٹل آئی ٹی لیب میں کمپیوٹر، تیز ترین انٹرنیٹ سمیت تمام سہولیات فراہم کی گئی ہیں، لیب میں فری لانسنگ، گرافک ڈیزائننگ، ڈیجیٹل مارکیٹنگ سمیت 15 اہم کورسز کی مفت تربیت فراہم کی جائے گی جہاں طلبہ و طالبات لاکھوں روپے کے مہنگے کورسز کی تربیت بالکل مفت حاصل کرسکیں گے، ہم چاہتے ہیں کہ غریب و مڈل کلاس فیملی کے بچوں کو بھی یکساں تعلیمی مواقع فراہم ہوں۔
انہوں نے مزید کہا کہ کورسز کی تکمیل طلبا و طالبات کو سیکنڈری سطح پر ہی بہترین ہنرمند بنادے گی، یہی بچے آگے چل آئی ٹی کے میدان میں کامیابیوں کی نئی تاریخ رقم کرتے ہوئے ملکی معیشت کے استحکام میں معاون ہوں گے۔انہوں نے کہا کہ پاکستان کو ڈیجیٹل دنیا سے منسلک کرنے کیلئے آئی ٹی کورسز و تعلیم پرائمری سطح سے دی جانی ضروری ہے اورنوجوانوں کو چاہئے کہ وہ خود کو آئی ٹی کی مہارتوں سے آراستہ کریں، آن لائن کاروبار شروع کریں اور ڈیجیٹل ٹیکنالوجی کا استعمال کرکے پیسے کمائیں۔
تقریب میں ایم کیو ایم پاکستان کی رابطہ کمیٹی کے اراکین سمیت رکن سندھ اسمبلی عباس جعفری، چیف ایگزیکٹو اگنائٹ عاصم شہریار و دیگر اہم شخصیات نے بھی شرکت کی۔