جماعتِ اسلامی کے ٹاؤن چیئرمین کا متوقع بارشوں سے نمٹنے کی تیاریوں پر زور
جماعت اسلامی سے تعلق رکھنے والے نارتھ ناظم آباد ٹاؤن کے چیئرمین عاطف علی خان نے متوقع بارشوں کے پانی کی نکاسی یقینی بنانے کے فعال اقدامات اور ہنگامی تیاریوں پر زور دیتے ہوئے تمام متعلقہ محکموں کو فوری کارروائی کی ہدایت کی ہے۔
جماعتِ اسلامی کے ٹاؤن چیئرمین کا متوقع بارشوں سے نمٹنے کی تیاریوں پر زور
کراچی: جماعت اسلامی سے تعلق رکھنے والے نارتھ ناظم آباد ٹاؤن کے چیئرمین عاطف علی خان نے متوقع بارشوں کے پانی کی نکاسی یقینی بنانے کے فعال اقدامات اور ہنگامی تیاریوں پر زور دیتے ہوئے تمام متعلقہ محکموں کو فوری کارروائی کی ہدایت کی ہے۔ آنے والے دنوں میں ممکنہ موسلا دھار بارشوں کے پیشِ نظر پیدا ہونے والی متوقع صورتِ حال کے جائزے کے لیے ٹاؤن کے ہنگامی دورے کے دوران انہوں نے یہ ہدایات دیں۔
ٹاؤن سے جاری کردہ پریس ریلیز میں چیئرمین نے گجر نالے سے ملحقہ آبادیوں کی طرف خصوصی توجہ مبذول کرائی، جہاں حالیہ تعمیراتی تبدیلیوں کے بعد متعدد مقامات پر پانی کی نکاسی کا فقدان پایا جاتا ہے۔ چیئرمین نے خدشہ ظاہر کرتے ہوئے کہا کہ یہ صورتحال ان آبادیوں کے باشندوں کے لیے سنگین مسائل پیدا کرسکتی ہے۔ انہوں نے خصوصاً ان حکام پر جو شادمان ٹاؤن اور گجر نالے سے نکاسی آب کے ذمہ دار ہیں، زور دیا کہ وہ ان علاقوں سے بارش کے پانی کی نکاسی کو ترجیح دیں۔
علاوہ ازیں جماعت اسلامی کے ٹاؤن چیئرمین نے سندھ سالڈ ویسٹ مینجمنٹ بورڈ سے کچرا اٹھانے کا کام تیزی سے مکمل کرنے کی اپیل کی۔ انہوں نے امید ظاہر کی کہ بورڈ کی جانب سے کچرا اٹھانے سے بارش کے پانی کی نکاسی میں رکاوٹ دور کی جا سکے گی، دوسری صورت میں شدید بارشوں سے ٹاؤن کی آبادیوں کی مشکلات بڑھ سکتی ہیں۔
عاطف علی خان نے محکمہ صفائی پر بھی زور دیا کہ سڑکوں پر صفائی اور بارش کا پانی صاف کرنے کے لیے مختص عملے کی مکمل حاضری کو یقینی بنایا جائے۔ اس طرح ٹریفک کا بہاؤ ہموار بنایا جائے اور بارش کے کھڑے پانی کی وجہ سے عوام کو ہونے والی تکالیف کو دور کیا جائے۔
ٹاؤن چیئرمین سابقہ بحرانی حالات میں جماعت اسلامی کے رضاکاروں کے اہم کردار کا اعتراف کرتے ہوئے ان افراد پر زور دیا کہ وہ کسی ہنگامی صورتحال کے لیے بھی خود کو تیار رکھیں۔ ان کی مثالی امدادی سرگرمیاں جو اُن کی شناخت بن چکی ہیں، بارش کے موسم میں ضرورت مندوں کو مدد اور ریلیف فراہم کرنے میں اہم ثابت ہوں گی۔
چیئرمین نے کمیونٹی کے تعاون کی اہمیت پر زور دیا اور تمام باشندوں کو محتاط رہنے اور اپنی حفاظت کو یقینی بنانے کے لیے ضروری احتیاطی تدابیر اختیار کرنے کو کہا۔ آخر میں جماعت اسلامی کے ٹاؤن چیئرمین نے بارش کے موسم میں نارتھ ناظم آباد ٹاؤن کے باشندوں کی سلامتی و بھلائی کے لیے دعا کی۔